SHBA ndalon ndihmat ushtarake për Ukrainën – Trump ndjek parimin “Amerika e para”
Administrata e re e presidentit amerikan Donald Trump ka pezulluar dërgimin e ndihmave ushtarake që i ishin premtuar Ukrainës, një sinjal i qartë se qëndrimi i Shtëpisë së Bardhë po ndryshon ndjeshëm ndaj luftës në Ukrainë. Kjo lëvizje përforcon perceptimin se Trumpi është më afër qëndrimeve të presidentit rus Vladimir Putin, duke sjellë paqartësi për të ardhmen e mbështetjes amerikane ndaj Kievit.
Departamenti amerikan i Mbrojtjes konfirmoi pezullimin e dërgesave, duke përfshirë edhe ato të miratuara nga administrata e mëparshme e Joe Biden. “Nuk mund të japim detaje për çfarë është pezulluar, por një rishikim gjithëpërfshirës është në proces,” deklaroi zëdhënësi i Pentagonit, Sean Parnell, duke theksuar parimin e ri udhëheqës të administratës: “Amerika e para”.
Gjatë një samiti të NATO-s në Hagë javën e kaluar, Trump zhvilloi një takim me presidentin ukrainas Volodymyr Zelensky, të cilin e quajti “shumë të mirë”. Megjithatë, në lidhje me raketat kundërajrore “Patriot” – kritike për mbrojtjen e Ukrainës ndaj sulmeve ajrore ruse – Trump u shpreh: “Ato janë shumë të vështira për t’u siguruar. Edhe ne kemi nevojë për to.”
Fundi i ndihmës amerikane për Ukrainën?
Sipas Max Bergmann, ekspert i Qendrës për Studime Strategjike dhe Ndërkombëtare (CSIS) në Uashington, ndihma për Ukrainën nuk përbën më prioritet për Shtëpinë e Bardhë. “Administrata Trump nuk do të kërkojë fonde të reja nga Kongresi. Pyetja e vetme është kur do të mbarojë ndihma e miratuar nga Biden,” tha ai.
Eksperti thekson se Trump nuk e sheh Rusinë si kërcënim në të njëjtën mënyrë si partnerët europianë të NATO-s, duke përjashtuar përfshirjen më të thellë të SHBA-së në luftën në Ukrainë.
Ndikimi edhe në ndihmat për zhvillim
Ndërprerja nuk ndalet vetëm në aspektin ushtarak. Administrata Trump ka mbyllur agjencinë amerikane për ndihmë në zhvillim (USAID), duke ndërprerë mbështetjen financiare për paga të mësuesve, punonjësve të emergjencës dhe projekte të tjera vitale për Ukrainën. Nga 4.3 miliardë dollarë në dhjetor, ndihmat për zhvillim ranë në vetëm 1.3 miliardë në mars – një trend që sipas ekspertëve pritet të vazhdojë.
A mund ta zëvendësojë Evropa?
Evropa përballet me presion të madh për të mbushur boshllëkun që lë SHBA. Por sipas Bergmann, është e vështirë që vende si Gjermania të përballojnë kostot në afat të shkurtër dhe të mesëm. “Është shumë e vështirë për Evropën të kompensojë tërheqjen amerikane,” paralajmëron ai.
Kjo situatë i hap rrugën një periudhe të pasigurt për Ukrainën dhe aleancën transatlantike, duke ngritur pikëpyetje serioze mbi të ardhmen e konfliktit dhe rolin e Perëndimit në mbështetjen ndaj Kievit.
